:
← 2 Tawarikh 5 2 Tawarikh 7 →

2 Tawarikh 6

1

Attu iato ma’kadami tu Salomo nakua: Mangkamo tu PUANG ma’kada, kumua la torro lan kamalillinan.

2

KubangunammoKomi misa’ banua, tu Minii unnisung, sia misa’ inan matontongan, tu Minii torro sae lakona.

3

Mangkato menggirikmi tu datu, anna passakkei tu mintu’ kombongan to Israel, tonna bendan tu mintu’ kombongan to Israel.

4

Sia ma’kada nakua: Mintu’ kadipudian lu langngan PUANG, Kapenombanna to Israel, tu mangka umpasundunni tu apa mangka Nasa’bu’ randan dipudukNa lako Daud, ambe’ku, Nakua:

5

Randuk dio mai allo Kunii ussolan taungKu sun lan mai tondok Mesir, tae’ Kupilei langsa’i tu misa’ kota dio lu mintu’ suku Israel, la dinii umbangunni tu misa’ banua, kumua anna nii sangangKu lan, sia tae’ra Kupilei langsa’i tu misa’ tau, kumua anna ia dadi arungna taungKu, to Israel;

6

sangadinna totemo Kupilei langsa’mo tu Yerusalem, la nanii sangangKu dio sia Kutonno’ bua kayumo tu Daud, kumua anna ia undatui taungKu, to Israel.

7

Attu iato bu’tumi lan penaanna Daud, ambe’ku, la umbangunanni banua tu sanganNa PUANG, Kapenombanna to Israel.

8

Apa ma’kada tu PUANG lako Daud, ambe’ku, Nakua: Belanna bu’tumo lan penaammu la umbangunanni misa’ banua tu sangangKu, melo dukamoto, ke bu’tumi lan penaammu susito.

9

Apa tae’ nala iko la umbangunni tu banua iato, sangadinna anakmu muane, tu sun dikalemu, iamo la umbangunanni banua tu sangangKu.

10

Naparampo randannamo PUANG tu kada mangka Napokada, belanna tunannangmo’ ussonda Daud, ambe’ku, sia unnisungmo’ dao kapayunganna Israel, susitu kadanNa PUANG, sia iate banua iate kubangunammo sanganNa PUANG, Kapenombanna to Israel.

11

Sia kupalanmo tu patti, tu nanii basseNa PUANG, tu Natananmo sola mintu’ to Israel.

12

Pakalan bendanmi tu datu dio tingayo inan pemalaranNa PUANG sitingoan mintu’ kombongan to Israel, anna mempala’ langngan langi’.

13

Belanna mangkamo nagaraga Salomo tu misa’ mimbar tambaga, napalanni tangnga’ tarampak, limang siku tu lambe’na. Limang siku tu babana, tallung siku tu langka’na, bendanmi dao anna malinguntu’ dio tingayona mintu’ kombongan to Israel, anna mempala’ langngan langi’.

14

Sia ma’kada nakua: O PUANG, Kapenombanna to Israel, tae’ tu Kapenomban senga’ susi Kamu, la lan langi’ la dao te kuli’na padang, tu umpalanda’ basseMi sia kamasokanamMi lako taumMi, tu lantuk penaanna lolang dio oloMi.

15

Sia tu umpalanda’i lako taumMi Daud, ambe’ku, tu apa mangka Mipokadanni, ondongpi Mipasundunmo tu apa mangka nasa’bu’ randan dipudukMi, susite allo totemo.

16

Na totemo, o PUANG, Kapenombanna to Israel, palanda’mi tu apa mangka Mipokada lako taumMi Daud, ambe’ku, kumua: Tang ka’tu tu bati’mu dio oloKu la unnisungi kapayunganna Israel, podo ke ungkaritutui lalanna tu anakMu muane sia unturu’ Sukaran alukKu susi kalolangammu dio oloKu.

17

Na totemo, o PUANG, Kapenombanna to Israel, dennoupa’ narampo randanna tu kada mangka Mipokada lako Daud, taumMi.

18

Tongannaraka tu Puang Matua la torro sola to lino dao kuli’na padang? Iatu langi’, moi iatu langi’ ma’iringanna dao, tae’ nakullei ulluangKomi, tang dipokada pissan te banua mangka kubangun.

19

Sailei tu passambayangna taumMi sia pengkamoyana, o PUANG, Kapenombangku, sia tanding talingai tu petamba sia passambayang napennoloan taumMi dio oloMi,

20

kumua Mitiroi te banua ke allo sia ke bongi, iamotu inan mangka Miallu’, kumua la Minii umpatorro sangamMi lan – amMi perangii tu passambayang, la napennoloan taumMi lan inan iate.

21

Perangii tu mintu’ pengkamoyana taumMi sia taumMi to Israel, tu la napennoloan lan inan iate. Manassa la Miperangii sia lan mai inan Minii torro, iamotu dao suruga; sia iamMi rangimi, la Mipa’dei tu kasalangki.

22

Iake denni misa’ tau kasalan lako solana, anna suai solana menggata, kumua naruai tampak ropu sia sae menggata dio tingayo inan pemalaramMi lan banua iate,

23

la Miperangii dao mai suruga, sia la Mipogau’ to, sia la Mipaolai salunna tu taumMi, amMi papakkanni lako to tang mekaaluk tu penggauranna sia Mipasule langngan botto ulunna, amMi tonganni tu to tongan sia Mipapakkanni sitinaya kamalamburanna.

24

Iake nataloi ualinna tu taumMi to Israel, belanna umpogau’ kasalan lako Kalemi, anna mengkatoba’ unnaku sangamMi sia massambayang sia mengkamoya dio oloMi lan banua iate,

25

la Miperangii dao mai suruga sia pa’dei tu kasalanna taumMi, to Israel sia pasulei tama tondok, tu mangka Mikamaseanni sia Mikamasean nene’ to dolona.

26

Iake titutu’i tu langi’, naurunganni tae’ uran sae, belanna kasalammo lako Kalemi, anna massambayang lan inan iate unnaku sangamMi sia untobaran salana, belanna Mipopengkadiongammo,

27

attu iato la Miperangii lan mai suruga sia la Mipa’dei tu kasalanna taumMi sia taumMi to Israel – belanna Mipatudu diona lalan melo tu tau iato mai, tu sipatu la naolai – sia Mipasaean uran tu padangMi, tu mangka Mikamasean taumMi la napomana’.

28

Iake ra’pak padangi lan tondok iato, ba’tu denmi ropu, ba’tu pasianni ba’tu langkoi tu gandung, ba’tu denni batik sola nango, ba’tu napapusa’i ualinna tu tau iato mai lan mintu’ kota dio lu tondokna, ke saei tu sala umbanna parri’ ba’tu saki;

29

sala umbanna passambayang ba’tu pengkamoya tu la napennoloan minda-mindannai tau ba’tu mintu’ taumMi Israel, belanna pantan natandai tu kamaparrisanna sia kamasussanna, naurunganni mempala’ lan banua iate:

30

Perangii lan mai suruga, inan matontonganMi sia pa’dei tu kasalanna sia pantan Mipapakkanni sitinaya mintu’ penggauranna, belanna Mitandai tu penaanna – belanna Kamu manna untandai tu penaanna mintu’ ma’rupa tau.

31

Anna kataku’Komi tu tau iato mai sia urrundu’ lalanMi lan mintu’ allo katuoanna lan tu tondok, tu Mikamasean nene’ to doloki.

32

Ia duka tu to sae, tu tangia taumMi to Israel, ke saei dio mai tondok mambela belanna sanga pasareongamMi sia lima mawatangMi sia takia’ tie’te’Mi, sia iake saei tu tau iato mai massambayang lan banua iate,

33

la Miperangii dao mai suruga, inan matontongamMi, sia pasituru’i tu mintu’ apa napengkamoyai to sae lako Kalemi, anna mintu’ bangsa dao kuli’na padang untandai tu sangamMi sia ungkasiri’Komi, susi taumMi to Israel, sia anna tandai, kumua sangamMimo tu disa’buranni te banua mangka kubangun.

34

Iake sunni tu taumMi la sirari ualinna lako lalan Mipapatuanni sia massambayang lako Kalemi mentingo lako kota iate, tu mangka Mipilei langsa’, sia lu lako banua iate, tu mangka kubangunan sangamMi,

35

perangii dao mai suruga tu passambayangna sia pengkamoyana sia tonganni.

36

Iake kasalammi tu tau iato mai lako Kalemi – moi misa’ tau tae’ tang kasalan –, anna re’dek ara’Mi lako tau iato mai sia Misorong lako ualinna, naurunganni napa’pepaliran tu tau iato mai lako tondok mambela ba’tu mandappi’,

37

sia iake napalan penaai tau iato mai tu apa iato lan tu tondok dinii male umpali’i, anna mengkatoba’ sia mengkamoya lako Kalemi lan tondok dinii urrampai, nama’kada nakua: kasalammokan, umpogau’mokan kakadakean sia tang mekaalukmokan,

38

sia iake lantukki tu tau iato mai mengkatoba’ situang penaa ponnona sia kalebu deatanna lan tondokna mintu’ to umpali’i, anna massambayang lako Kalemi mentingo lako tondok iate, tu mangka Mikamasean nene’ to dolona, sia lako kota iate tu mangka Mipilei langsa’ sia lu lako banua iate, tu mangka kubangunan sangamMi,

39

attu iato la Miperangii dao mai suruga, inan matontongamMi, tu passambayangna sia pengkamoyana tau iato mai, amMi tongananni sia la Mipagarri’ tu mintu’ apa napokasalan lako Kalemi.

40

Iamoto, o Kapenombangku, la Mitiro sia la Miperangii tu passambayang indete inan iate.

41

Totemo ke’de’Komi, o PUANG Kapenomban lako inan katorroamMi, la Kamu la iatu patti kuasamMi. Sangapaoi anna umpembungku’ kasalamaran tu mintu’ to minaaMi, o PUANG Kapenomban, sia iatu mintu’ to masallo’Mi umpopaimanni tu kameloan.

42

O PUANG Kapenomban, da Mitananni boko’ tu to ditokkoMi, kilalai tu mintu’ pa’kamasemi lako Daud, taumMi.

Link:
← 2 Tawarikh 5 2 Tawarikh 7 →